清泉！加拿大逐步放寬邊境 逆市加收移民！
疫情爆發以嚟好多國家都開始減少、暫停、甚至取消移民計劃，不過有個大國竟然趁呢段時間大力加推移民，佢就係我哋港人摯愛加拿大！
加拿大移民快速通道（EE）喺4月份邀請咗11,700人申請移民，對比3月份嘅7,800人足足增加咗50%！係50%呀飛雲！相比之下，用類近制度嘅澳洲技術移民喺4月只邀請咗100人申請移民，比起3月嘅2,050足足少咗95%。
除咗繼續加推移民外，加拿大亦逐步放寬邊境限制，之前暫停接受申請以及入境嘅國際體驗計劃（IEC），包括工作假期Working Holiday、年輕專業人員Young Professional及國際合作International Co-op已經重新接受申請，並由5月8日起，參加IEC嘅外籍人士只要持有效雇主工作邀請函，以及加拿大政府批准申請時簽發嘅介紹信（LOI）即可入境加拿大，**注意入境後仲需要隔離14日。
疫情爆發前，加拿大政府就宣佈2020年目標移民人數係34萬人，預計2021同2022年將增加到更高水平 。根據過往加拿大移民局嘅數據，每年超過50%屬於商業類移民，當中大部分喺技術移民形式。喺各國都封閉自己嘅情況下，加拿大政府對移民都一直持開放同埋友善嘅態度，真係非常難得！同埋加拿大向來都係我哋港人移民嘅首選，有興趣移民加拿大嘅朋友要好好把握呢段時間，盡快申請移民加拿大喇！
